古勝一直強調，花旗總統大選，花旗魚缸例升，即使今年經濟環境急轉直下，金融機構仍受次按問題所困擾，但花旗魚缸以高位計算，調整幅度唔算深。因為花旗魚缸呢個死頂因素，在下認為今個月本地魚缸未必會出事，只會繼續上落格局。不過隔晚花旗魚缸表現太樣衰，在「油魔」重創、金價狂插，美匯轉強等因素刺激下高開，道指早段曾升200點，但無奈納指跟標普500頂唔住，最終道指亦被拖落水，三指數倒跌散場。

亞太區魚缸亦唔多頂得住，雖然東瀛魚缸略見反彈，但區內大部分魚缸繼續走弱，本地魚缸開波即失守二萬一大關，反映周二下半場扭轉跌勢倒升，不過係春夢一場。祖國魚缸未止瀉，即使近日下跌速度有所放緩，但白頭任一句祖國魚缸下挫好正常，無需要出手救市，令本地魚缸下半場沽壓加劇。淡友殺得性起，指盤中低見20,526點，報收20,585點，跌457點。國企指數仲大鑊，跌逾3%，險守萬一關，報收11,076點，跌376點，國期跌幅更達4%。

期貨場由高水轉低水，報收20,543點，不過撇除幾件重量級大隻佬的除淨因素，低水42點實際有高水。成交額略增至560億元，唔算特別多。睇完尋日本地魚缸走勢，古勝要修正九月份魚缸走勢預測，估計月內要再創今年低位，二萬點肯定守唔住，至於萬九點企唔企得住，古勝烏卜卜。

資源股成重災區©
藍色大隻佬只有大飛機（00293）跟港鐵（00066）逆市上升，前者受惠油價急跌，逆市升0.5%；後者升0.1%，都係險過剃頭。油價急跌拖累商品價格急挫，美元走強亦重挫金價，資源股成重災區，中國鋁業（02600）跌6.3%，又一次在成分股中包尾。中海油（00883）跌近6%，報收10.7元，口痕友打賭，幾時步中石油（00857）後塵，失守10元位。

呢幾日強勢的平保（02318）亦顯著下跌，報收55.3元，跌2.95元或5%。祖國野獸（02628）跌2.5%無咁傷，報收28.95元，但沽壓浮現，唔排除呢兩日跌勢加劇。其他紅色錢莊，由於H股普遍較A股存溢價，若然祖國魚缸持續走低，紅色錢莊就算長線有幾吸引，短線都要先避風頭，皆因寧買當頭起，莫買當頭跌也。

古勝相信二萬關好快失守，大笨象（00005）或者係下一跌浪的火車頭，報收121.6元，成交額暫時唔算多，但當成交放大時，跌勢將加速。祖國移動（00941）彈唔起，昨日雖未再創年內新低，但亦跌2.6%，「小魔怪」目標價75元，唔係得個講字。

內需股有價有市©
尋日魚缸走晒樣，但仍有升幅高達164%的超級火箭出現。可口可樂宣布以每股現金價12.2元，全面收購源果汁（01886），帶動股價一度高見11.28元，報收10.94元。由於交易要年底才完成，加上需要股東會通過，期間或有變卦，所以股價較收購價出現折讓好正常，古勝唔認為係呢個位仲可以追。

可口可樂肯係市況咁惡劣之際，向源提出收購，可見只要係有價值的投資，仍會有伯樂賞識，尤其係內需及分銷股，吸引力大大提升。源呢單刁，昨日刺激一眾內需股做好，百麗（01880）逆市升1.1%，表現不俗。

百麗在去年五月上市，集資額高達82億元。自成功集資後，百麗動用近50億元資金，進行多項收購，當中更包括運動服裝品牌Fila於中國、香港及澳門之商標，同時以近1億元與品牌最終持有人成立合資公司，在中港澳推廣Fila商品，集團佔合資公司85%權益，開拓運動服業務。

古勝相信，百麗的收購計劃陸續有來，為的是要保持其在鞋類市場的領導地位。雖然在內地經濟增長呈現放緩之下，百麗的銷售利潤率或受壓，但因其品牌組合具認受性，加上在祖國強而有力的分銷平台支持下，其全年經常性利潤仍可錄得可觀增長。古勝將目標價定在10元，相當於○九年22倍預測市盈率。

古勝